Unngå svindel: Slik vernar du deg mot digitale bedrag

Kvart år blir mange nordmenn utsette for svindelforsøk, særleg i samband med skattemeldinga. Svindlarar misbrukar offentlege etatar sine namn for å lure folk til å gje frå seg sensitiv informasjon. Live Strand, rådgjevar for betalingsformidling og kompetanse i Sparebanken DIN Telemark, deler sine beste råd for korleis du kan kjenne igjen svindelforsøk og beskytte deg mot digitale bedrag.

Dei vanlegaste metodane svindlarane brukar

Svindlarar nyttar ofte logoar og namn frå Altinn og Skatteetaten i phishing-SMS og e-postar. Desse meldingane inneheld lenkjer som ser ekte ut, men som i realiteten er laga for å stjela sensitiv informasjon som kort- og kontoinformasjon eller BankID-opplysningar.

– Budskapet kan typisk vere at du har pengar til gode på skatten, og for å få att desse må du registrere diverse opplysningar. Det som faktisk skjer, er at svindlarane speglar informasjonen du legg inn og bruker det til å utføre transaksjonar på andre nettstader eller overføringar frå kontoen din i nettbanken, forklarar Strand.

Skatteoppgjeret blir behandla i perioden mars til oktober, noko som betyr at slike svindelforsøk skjer store delar av året.

Kva gjer du dersom du mottar ein mistenkeleg SMS, e-post eller telefonoppringing?

For å unngå å bli lurt, rådar Strand kundane til å vere ekstra merksame på:

• Avsendar: Sjekk alltid kven som har sendt meldinga, og ikkje berre sjå på visningsnamnet.
• Språket: Dårleg norsk kan vere eit teikn på svindel, men med KI (Kunstig intelligens) har dette blitt vanskelegare å avsløre.
• Lenkjer: Viss meldinga inneheld ei lenkje, er det stor sjanse for at det er phishing. Logg alltid inn via den offisielle nettsida eller appen til tenesteleverandøren.
• Telefonoppringingar: Ikkje oppgi personlege kodar til nokon, uansett kven som ringer. Banken eller politiet vil aldri be deg om dette.
• BankID-signering: Les BankID-varselet nøye. Signer aldri noko utan å vere heilt trygg på kva du godkjenner.

Artikkelen fortset under bilete

Rådgjevar Live Strand

Korleis kan du beskytte deg mot svindel generelt?

For å sikre seg mot digitale bedrag, rådar Strand kundane til å:

• Ha eit aktivt forhold til nettbanken og setje ein låg beløpsgrense for transaksjonar.
• Aldri oppdatere personleg informasjon via tilsendte lenkjer, men alltid gjere dette på "Mine sider" hos den aktuelle tenesteleverandøren.
• Unngå å handle i hastverk. Svindlarar bruker ofte stressande meldingar for å få deg til å handle raskt.
• Stopp opp og tenk: Har eg faktisk eit kundeforhold hos denne aktøren? Virkar meldinga truverdig?

Kva gjer banken for å hjelpe kundane?

Sparebanken DIN Telemark jobbar aktivt for å beskytte kundane mot svindel gjennom fleire tiltak:

• Informasjon via fysiske møter, sosiale medier og nettsida.
• Ulike antisvindelløysingar som kan stoppe svindelforsøk før dei gjer skade.

Konklusjon

Svindelmetodane blir stadig meir sofistikerte, men ved å vere medviten og følgje enkle tryggingsråd kan du redusere risikoen for å bli lurt. Har du nokon gong mistanke om svindel, ikkje nøl med å kontakte banken for rådgiving. Det er alltid betre å vere på den sikre sida!